1Sa 24 | CopSahBible2 | STEP | ⲁⲩⲱ ⲇⲁⲩⲉⲓⲇ ⲁϥⲓ ⲉϩⲣⲁⲓ ϩⲙ ⲡⲙⲁ ⲉⲧⲙⲙⲁⲩ ⲁϥϩⲙⲟⲟⲥ ϩⲛ ⲛⲙⲁ ⲉⲧϩⲉϫϩⲱϫ ϩⲛ ⲉⲅⲅⲁⲇⲇⲓ

1 Samuel 24

1 ⲁⲩⲱ ⲇⲁⲩⲉⲓⲇ ⲁϥⲓ ⲉϩⲣⲁⲓ ϩⲙ ⲡⲙⲁ ⲉⲧⲙⲙⲁⲩ ⲁϥϩⲙⲟⲟⲥ ϩⲛ ⲛⲙⲁ ⲉⲧϩⲉϫϩⲱϫ ϩⲛ ⲉⲅⲅⲁⲇⲇⲓ 2 ⲁⲥϣⲱⲡⲉ ⲇⲉ ⲛⲧⲉⲣⲉⲥⲁⲟⲩⲗ ⲕⲟⲧϥ ⲉⲃⲟⲗ ϩⲛ ⲛⲁⲗⲗⲟⲫⲩⲗⲟⲥ ⲁⲩϫⲓ ⲡⲟⲩⲱ ⲛⲁϥ ⲉⲩϫⲱ ⲙⲙⲟⲥ ϫⲉ ⲉⲓⲥ ⲇⲁⲩⲉⲓⲇ ϩⲛ ⲧⲉⲣⲏⲙⲟⲥ ⲛⲉⲅⲅⲁⲇⲇⲓ 3 ⲁⲩⲱ ⲁϥϫⲓ ⲛⲙⲙⲁϥ ⲛϣⲟⲙⲛⲧ ⲛϣⲟ ⲛⲣⲱⲙⲉ ⲛⲥⲱⲧⲡ ⲉⲃⲟⲗ ϩⲙ ⲡⲓ︤ⲏ︦ⲗ︥ ⲧⲏⲣϥ ⲁϥⲃⲱⲕ ⲉⲕⲱⲧⲉ ⲛⲥⲁ ⲇⲁⲩⲉⲓⲇ ⲙⲛ ⲛⲉϥⲣⲱⲙⲉ ⲉⲧⲛⲙⲙⲁϥ ϩⲣⲁⲓ ϩⲙ ⲡⲕⲁϩ ⲛⲥⲁⲇⲁⲓⲙ ⲉⲧⲉⲡⲙⲁ ⲡⲉ ⲛⲧϭⲟⲣϭⲥ ⲛⲛⲉⲓⲟⲩⲗ 4 ⲁϥⲉⲓ ⲉϩⲣⲁⲓ ⲉϫⲛ ⲛⲁⲅⲅⲉⲗⲏ ⲛⲛⲉϣⲟⲟⲥ ⲉⲧϩⲛⲧⲉϩⲓⲏ ⲛⲉⲣⲉⲟⲩⲉⲙϩⲁⲁⲩ ⲇⲉ ϩⲙ ⲡⲙⲁ ⲉⲧⲙⲙⲁⲩ ⲁⲩⲱ ⲥⲁⲟⲩⲗ ⲁϥⲃⲱⲕ ⲉϩⲟⲩⲛ ⲉⲣⲟϥ ⲉⲥⲉⲛⲣⲁⲧϥ ⲇⲁⲩⲉⲓⲇ ⲇⲉ ⲙⲛ ⲛⲉϥⲣⲱⲙⲉ ⲛⲉⲩϩⲙⲟⲟⲥ ⲛⲥⲁ ⲟⲩⲛⲁⲙ ⲙⲡⲉⲙϩⲁⲁⲩ 5 ⲛⲣⲱⲙⲉ ⲇⲉ ⲛⲇ︤ⲁ︦ⲇ︥ ⲡⲉϫⲁⲩ ⲛⲁϥ ϫⲉ ⲉⲓⲥ ⲡⲁⲓ ⲡⲉ ⲡⲉϩⲟⲟⲩ ⲛⲧⲁⲡϫⲟⲉⲓⲥ ϫⲟⲟⲥ ⲛⲁⲕ ⲉⲧⲃⲏⲏⲧϥ ϫⲉ ⲉⲓⲥ ϩⲏⲏⲧⲉ ⲁⲛⲟⲕ ϯⲛⲁϯ ⲙⲡⲉⲕϫⲁϫⲉ ⲉϩⲣⲁⲓ ⲉⲛⲉⲕϭⲓϫ ⲛⲅⲉⲓⲣⲉ ⲛⲁϥ ⲕⲁⲧⲁ ⲡⲁⲅⲁⲑⲟⲛ ⲉⲧⲛⲁϣⲱⲡⲉ ⲛⲁϩⲣⲟⲕ ⲇ︤ⲁ︦ⲇ︥ ⲇⲉ ⲁϥⲧⲱⲟⲩⲛ ⲁϥϣⲱϥ ⲙⲡⲧⲁⲡ ⲛⲧⲉϥⲇⲓⲡⲗⲱⲉⲓⲥ ⲙⲡⲉⲥⲁⲟⲩⲗ ⲉⲓⲙⲉ 6 ⲁⲥϣⲱⲡⲉ ⲇⲉ ⲙⲛⲛⲥⲁ ⲛⲁⲓ ⲡϩⲏⲧ ⲛⲇⲁⲩⲉⲓⲇ ⲁϥⲙⲕⲁϩ ⲉⲣⲟϥ ⲉⲧⲃⲉ ϫⲉ ⲁϥϣⲱϥ ⲙⲡⲧⲁⲡ ⲛⲧⲉⲭⲗⲁⲙⲩⲥ ⲛⲥⲁⲟⲩⲗ 7 ⲡⲉϫⲉⲇⲁⲩⲉⲓⲇ ⲛⲛⲉϥⲣⲱⲙⲉ ϫⲉ ⲛⲛⲉⲡⲉⲓϩⲱⲃ ϣⲱⲡⲉ ⲙⲙⲟⲓ ⲛⲧⲟⲟⲧϥ ⲙⲡϫⲟⲉⲓⲥ ⲉⲧⲣⲁⲉⲓⲣⲉ ⲙⲡⲉⲓϣⲁϫⲉ ⲙⲡϫⲟⲉⲓⲥ ⲙⲡⲉⲭ︤ⲣ︦ⲥ︥ ⲙⲡϫⲟⲉⲓⲥ 8 ⲁⲩⲱ ⲇⲁⲩⲉⲓⲇ ⲁϥⲡⲓⲑⲉ ⲛⲛⲉϥⲣⲱⲙⲉ ϩⲙ ⲡⲉⲓϣⲁϫⲉ ⲙⲡⲉϥϯⲑⲉ ⲛⲁⲩ ⲉⲧⲱⲟⲩⲛ ⲉⲙⲉⲟⲩⲧⲥⲁⲟⲩⲗ ⲥⲁⲟⲩⲗ ⲇⲉ ⲁϥⲧⲱⲟⲩⲛ ⲁϥⲓ ⲉⲃⲟⲗ ⲉⲧⲉϥϩⲓⲏ 9 ⲁⲩⲱ ⲇⲁⲩⲉⲓⲇ ⲁϥⲓ ⲉⲃⲟⲗ ⲙⲛⲛⲥⲱϥ ϩⲙ ⲡⲉⲙϩⲁⲁⲩ ⲁⲇ︤ⲁ︦ⲇ︥ ⲱϣ ⲉⲃⲟⲗ ϩⲓⲡⲁϩⲟⲩ ⲛⲥⲁⲟⲩⲗ ⲉϥϫⲱ ⲙⲙⲟⲥ ϫⲉ ⲡⲁϫⲟⲉⲓⲥ ⲡⲣⲣⲟ ⲥⲁⲟⲩⲗ ⲇⲉ ⲁϥⲕⲟⲧϥ ⲉⲡⲁϩⲟⲩ ⲁⲩⲱ ⲇⲁⲩⲉⲓⲇ ⲁϥⲡⲁϩⲧϥ ⲉϫⲙ ⲡⲉϥϩⲟ ⲉϫⲙ ⲡⲕⲁϩ ⲁϥⲟⲩⲱϣⲧ ⲛⲁϥ 10 ⲁⲩⲱ ⲡⲉϫⲉⲇⲁⲩⲉⲓⲇ ⲛⲥⲁⲟⲩⲗ ϫⲉ ⲉⲧⲃⲉ ⲟⲩ ⲕⲥⲱⲧⲙ ⲛⲥⲁ ⲛⲉϣⲁϫⲉ ⲙⲡⲗⲁⲟⲥ ⲉⲩϫⲱ ⲙⲙⲟⲥ ⲛⲁⲕ ϫⲉ ⲉⲓⲥ ⲇⲁⲩⲉⲓⲇ ⲕⲱⲧⲉ ⲛⲥⲁ ⲧⲉⲕⲯⲩⲭⲏ ⲉϥⲓⲧⲥ 11 ⲉⲓⲥ ϩⲏⲏⲧⲉ ϭⲉ ϩⲙ ⲡⲟⲟⲩ ⲛϩⲟⲟⲩ ⲁⲛⲉⲕⲃⲁⲗ ⲛⲁⲩ ⲉⲑⲉ ⲛⲧⲁⲡϫⲟⲉⲓⲥ ⲧⲁⲁⲕ ⲉⲧⲟⲟⲧ ⲙⲡⲟⲟⲩ ϩⲙ ⲡⲉⲙϩⲁⲁⲩ ⲁⲩⲱ ⲙⲡⲓⲟⲩⲱϣ ⲉⲙⲟⲟⲩⲧⲕ ⲁⲗⲗⲁ ⲁⲓϯⲥⲟ ⲉⲣⲟⲕ ⲉⲁⲓϫⲟⲟⲥ ϫⲉ ⲛϯⲛⲁⲉⲛⲧⲟⲟⲧ ⲁⲛ ⲉϫⲙ ⲡⲁϫⲟⲉⲓⲥ ϫⲉ ⲡⲁⲓ ⲡϫⲟⲉⲓⲥ ⲁϥⲧⲁϩⲥϥ 12 ⲁⲩⲱ ⲉⲓⲥ ⲡⲧⲁⲡ ⲛⲧⲉⲕⲭⲗⲁⲙⲩⲥ ϩⲛ ⲛⲁϭⲓϫ ⲁⲛⲟⲕ ⲁⲓϥⲓⲧϥ ⲁⲩⲱ ⲙⲡⲓⲙⲟⲟⲩⲧⲕ ⲉⲓⲙⲉ ϭⲉ ⲛⲅⲛⲁⲩ ⲙⲡⲟⲟⲩ ϫⲉ ⲙⲛⲕⲁⲕⲓⲁ ⲗⲁⲁⲩ ⲛⲧⲟⲟⲧ ⲉϩⲟⲩⲛ ⲉⲣⲟⲕ ⲟⲩⲇⲉ ⲙⲛⲧϣⲁϥⲧⲉ ⲟⲩⲇⲉ ⲛⲉⲓⲁϩⲉ ⲁⲛ ⲉⲃⲟⲗ ⲉⲣⲟⲕ ⲙⲡⲓⲣⲛⲟⲃⲉ ⲉⲣⲟⲕ ⲛⲧⲟⲕ ⲇⲉ ⲉⲕⲑⲉⲙⲕⲟ ⲛⲧⲁⲯⲩⲭⲏ ⲉϥⲓⲧⲥ 13 ⲉⲣⲉⲡϫⲟⲉⲓⲥ ϯϩⲁⲡ ⲟⲩⲧⲱⲕ ⲟⲩⲧⲱⲓ ⲛⲧⲉⲡϫⲟⲉⲓⲥ ⲣⲡⲁⲕⲃⲁ ⲛⲙⲙⲁⲕ ⲁⲩⲱ ⲧⲁϭⲓϫ ⲛⲁⲉⲓ ⲁⲛ ⲉϫⲱⲕ 14 ⲕⲁⲧⲁ ⲑⲉ ⲉϣⲁⲩⲧⲁⲩⲉⲧⲉⲓⲡⲁⲣⲁⲃⲟⲗⲏ ⲛⲁⲣⲭⲁⲓⲟⲛ ϫⲉ ⲉⲣⲉⲡⲛⲟⲃⲉ ⲛⲁⲉⲓ ⲉⲃⲟⲗ ϩⲛ ⲛⲁⲛⲟⲙⲟⲥ ⲁⲩⲱ ⲧⲁϭⲓϫ ⲛⲁⲉⲓ ⲁⲛ ⲉϫⲱⲕ 15 ⲧⲉⲛⲟⲩ ϭⲉ ⲛⲧⲟⲕ ⲡⲣⲣⲟ ⲙⲡⲓ︤ⲏ︦ⲗ︥ ⲉⲕⲕⲱⲧⲉ ⲛⲥⲁ ⲛⲓⲙ ⲁⲩⲱ ⲉⲕⲡⲏⲧ ⲛⲧⲟⲕ ⲛⲥⲁ ⲟⲩⲁϣ ⲙⲙⲓⲛⲉ ⲉⲕⲡⲏⲧ ⲛⲧⲟⲕ ⲛⲥⲁ ⲟⲩϩⲟⲣ ⲉϥⲙⲟⲟⲩⲧ ⲁⲩⲱ ⲉⲕⲡⲏⲧ ⲛⲥⲁ ⲟⲩⲡⲏⲓ ⲛⲟⲩⲱⲧ 16 ⲡϫⲟⲉⲓⲥ ⲉϥⲉϣⲱⲡⲉ ⲛⲕⲣⲓⲧⲏⲥ ⲁⲩⲱ ⲛⲇⲓⲕⲁⲥⲧⲏⲥ ⲟⲩⲧⲱⲓ ⲟⲩⲧⲱⲕ ⲡϫⲟⲉⲓⲥ ⲉϥⲉϭⲱϣⲧ ⲛϥⲕⲣⲓⲛⲉ ⲙⲡⲁϩⲁⲡ ⲁⲩⲱ ⲛϥϩⲙⲟⲟⲥ ⲉϩⲣⲁⲓ ⲛⲙⲙⲁⲕ 17 ⲛⲧⲉⲣⲉⲇⲁⲩⲉⲓⲇ ⲇⲉ ⲟⲩⲱ ⲉϥⲧⲁⲩⲟ ⲛⲛⲉⲓϣⲁϫⲉ ⲉϩⲟⲩⲛ ϩⲛ ⲥⲁⲟⲩⲗ ⲡⲉϫⲉⲥⲁⲟⲩⲗ ⲛⲁϥ ϫⲉ ⲧⲉⲕⲥⲙⲏ ⲧⲉ ⲧⲁⲓ ⲡⲁϣⲏⲣⲉ ⲇⲁⲩⲉⲓⲇ ⲁⲩⲱ ⲥⲁⲟⲩⲗ ⲁϥϥⲓ ϩⲣⲁϥ ⲉⲃⲟⲗ ⲁϥⲣⲓⲙⲉ 18 ⲡⲉϫⲁϥ ⲛⲇⲁⲩⲉⲓⲇ ϫⲉ ⲕⲙⲁⲓⲏⲩ ⲛⲧⲟⲕ ⲡⲁϣⲏⲣⲉ ⲉϩⲟⲩⲉ ⲉⲣⲟⲓ ϫⲉ ⲛⲧⲟⲕ ⲙⲉⲛ ⲁⲕⲧⲱⲱⲃⲉ ⲛⲁⲓ ⲛϩⲉⲛⲡⲉⲧⲛⲁⲛⲟⲩⲟⲩ ⲁⲛⲟⲕ ⲇⲉ ⲁⲓⲧⲱⲱⲃⲉ ⲛⲁⲕ ⲛϩⲉⲛⲡⲉⲑⲟⲟⲩ 19 ⲙⲡⲟⲟⲩ ⲟⲛ ⲁⲕⲧⲁⲙⲟⲓ ⲉⲡⲁⲅⲁⲑⲟⲛ ⲛⲧⲁⲕⲁⲁϥ ⲛⲁⲓ ⲛⲑⲉ ⲛⲧⲁⲡϫⲟⲉⲓⲥ ⲧⲁⲁⲧ ⲉϩⲣⲁⲓ ⲉⲛⲉⲕϭⲓϫ ⲁⲩⲱ ⲙⲡⲉⲕⲧⲱⲟⲩⲛ ⲉⲙⲟⲟⲩⲧ 20 ⲁⲩⲱ ⲉⲣϣⲁⲛⲟⲩⲁ ϩⲉ ⲉⲡⲉϥϫⲁϫⲉ ϩⲛ ⲟⲩⲑⲗⲓⲯⲓⲥ ⲛϥⲟⲩⲟⲟⲧϥ ⲉⲃⲟⲗ ϩⲛ ⲟⲩϩⲓⲏ ⲉⲛⲁⲛⲟⲩⲥ ⲡϫⲟⲉⲓⲥ ⲛⲁⲧⲱⲱⲃⲉ ⲛⲁϥ ⲛϩⲉⲛⲡⲉⲧⲛⲁⲛⲟⲩⲟⲩ ⲕⲁⲧⲁ ⲑⲉ ⲛⲧⲟⲕ ⲛⲧⲁⲕⲣⲡⲡⲉⲧⲛⲁⲛⲟⲩϥ ⲙⲡⲟⲟⲩ 21 ⲧⲉⲛⲟⲩ ϭⲉ ⲉⲓⲥ ϩⲏⲏⲧⲉ ϯⲥⲟⲟⲩⲛ ϫⲉ ϩⲛ ⲟⲩⲙⲛⲧⲣⲣⲟ ⲕⲛⲁⲣⲣⲣⲟ ⲁⲩⲱ ⲧⲙⲛⲧⲣⲣⲟ ⲙⲡⲓ︤ⲏ︦ⲗ︥ ⲛⲁⲁϩⲉⲣⲁⲧⲥ ϩⲛ ⲛⲉⲕϭⲓϫ 22 ⲧⲉⲛⲟⲩ ϭⲉ ⲱⲣⲕ ⲛⲁⲓ ⲙⲡϫⲟⲉⲓⲥ ϫⲉ ⲛⲅⲛⲁⲃⲱⲧⲉ ⲉⲃⲟⲗ ⲁⲛ ⲙⲡⲁⲥⲡⲉⲣⲙⲁ ⲙⲛⲛⲥⲱⲓ ⲁⲩⲱ ϫⲉ ⲛⲅⲛⲁⲧⲁⲕⲟ ⲁⲛ ⲙⲡⲁⲣⲁⲛ ⲉⲃⲟⲗ ϩⲙ ⲡⲏⲓ ⲙⲡⲁⲉⲓⲱⲧ 23 ⲁⲩⲱ ⲇⲁⲩⲉⲓⲇ ⲁϥⲱⲣⲕ ⲛⲥⲁⲟⲩⲗ ⲥⲁⲟⲩⲗ ⲇⲉ ⲁϥⲃⲱⲕ ⲉϩⲣⲁⲓ ⲉⲡⲉϥⲙⲁ ⲁⲩⲱ ⲇⲁⲩⲉⲓⲇ ⲙⲛ ⲛⲉϥⲣⲱⲙⲉ ⲁⲩⲃⲱⲕ ⲉϩⲣⲁⲓ ⲉⲙⲉⲥⲥⲁⲣⲁ ⲧⲉⲧϭⲏⲩ